أولا: مرحبا بك عمر بيه في منتدانا ( المتواضع )
ثانيا: الدنيا بتتغير واللي يقف في مكانه ح يختفي في ظل ظروف التقدم الكبير اللي انت شايفه ده.
ثالثا: فكرة المنتدى نفذتها في ظروف صعبة جدا وكان لازم اعمل حاجه تربط بين المدرس والطالب في ظل ظروف الوباء اللي أسأل الله عز وجل إنه يكشفه عننا.
رابعا: المنتدى عمره ما ح يغني عن المدرسه و إلا كان كل الطلبة قعدت ف بيوتها، لكن ممكن يكون للمنتدى تأثيره في حالة احتياج الطالب لكتاب مش لاقيه أو ملزمه تساعده على المذاكرة أو عرض باور بوينت يرفعه المدرس لطلابه عن موضوع أو درس أو إعلان نتيجة دراسيه ، الغرض من المنتدى الفعلي من وجهة نظري إنه تكميلي لدور المدرسة الكبير اللي بتأثر بيه في حياة الطالب بل وفي بعض الأوقات في حياة ولي الأمر، لكن نقول الانترنت يكون بديل فعلي للمدرسة عمره ما ح يكون أبدا والسبب كبير جدا وبسيط جدا ؛ إن المدرسة حوار مفتوح بين الطالب والمدرس حوار من خطين أو اتجاهين أما الانترنت فالحوار من اتجاه واحد، وحتى لو لجأنا للحوار المفتوح عن طريق الغرف أو الشات عمره ما حيكون زي المدرسة أبدا ثم ان الانترنت ممكن يكون تعليمي لكن يكون تربوي صعب جدا.
خامسا: المنتدى لازال يحبو وده يومه الثالث وفين احنا وفين اليوم اللي يكون فيه المنتدى ده اللي أفخر بيه أنا وأعضاؤه إنه واجه حقيقية للمدرسة اللي خرجت أجيال وانت تشهد على كده.
أخيرا لا يسعني إلا إني أشكرك على حضورك وأتمنى أشوف إقتراحاتك وآراءك اللي تفيدنا وما تنساش اننا كلنا في مركب واحد.
لك مني أجمل التمنيات بحياة موفقة دين ودنيا .. آمين.
المشرف winter
